بسم الله الرحمن الرحيم ناسف لاطاله المنشور ولكن كل حرف في هذا المنشور له وزنه وبسم الله نبدا الحي القيوم .. سر الحياة الساري في كل كينونة .. فيه آيه لو تأملتها بصدق هتعرف إنها بتشرح كل حاجة حصلت وبتحصل وهتحصل .. الله لا إله إلا هو الحي القيوم .. الايه دي مش وصف لإله بعيد .. ولكن دي قانون كوني شامل بيشرح ازاي الوجود بيتحرك وازاي كل حاجة بتعيش .. الحي .. هو الحي بذاته يعني الحياة المطلقة الوعي الساري النور المتدفق اللي مالوش بداية ولا نهاية .. القيوم .. يعني اللي قائم في مخلوقاته وقائم بكونه حاله حياة مطلقه جوة الصور كلها .. يعني الحياة مش مجرد حركة ولكن الحياة وعي وسريان متدفق باستمرار .. ومش مجرد نبض أو أكسجين ولكن دي قوة خفية بتحرك كل ذرة في الكون .. وبتخلي الإلكترون يدور حوالين النواة والنواة نفسها تحافظ على توازنها .. وبتخلي القلب يدق والوردة تتفتح والمجرة تفضل تمشي في مدارها .. الحي القيوم هو الوعي الحي اللي قايم بكل الكون بتنوعه .. يعني هو اللي حي بذاته وقايم بحياته في مخلوقاته .. ولما قال .. وجعلنا من الماء كل شئ حي كان بيوصف سر تاني أعمق من مجرد إن الميه مطلوبة عشان نعيش .. لان هو ما قالش .. وجعلنا الماء كل شئ حي .. لكن قال .. من الماء وده فرق دقيق جدا .. يعني المية مش الحياة نفسها ولكنها هي الوسيط اللي الحياة بتعدي من خلاله ومجرد ممر .. وهي مش حية بذاتها ولكنها بتحمل الحياة في صور مختلفة زي مرآة بتعكس النور .. ومع ان هي مش النور لكنها بتخليه يظهر .. المية عنصر غريب جدا على فكرة .. هى ميتة في ذاتها لكنها مثالية لتمرير طاقة الحياة يعني الميه مش كائن حي ولكنها وسيط بيشيل الحياة وبيوصلها لكل شئ عشان يبقي حي بقيام الحي فيه .. لانها بتحتوي على القابلية الكاملة إنها تشيل الحياة جواها ودي أعظم مفارقة في الخلق .. لما الميت بيحمل سر الحي .. وربنا قال .. يخرج الحي من الميت ويخرج الميت من الحي .. وده بيفسر ليه كل الكائنات فيها حوالي ٧٥٪ مية من أول الإنسان لحد النبتة .. لأن المية هي النسيج المعلوماتي اللي الوعي الإلهي بيستخدمه علشان يظهر في المادة .. المية مش مجرد معادله H2O ولكن المية كيان واعي من نوع تاني مش وعي شخصي لكن وعي انعكاسي .. كيان بيقرأ وبيسجل وبيترجم .. يعني المية بتقرأ الكينونة اللي قدامها وبتتعامل معاها حسب ما فيها من بيانات .. يعني إيه الكلام دة ؟ يعني المية اللي بتروي بذرة ليمون بتقرأ الشفرة اللي جوه البذرة وبتتعامل معاها على هذا الأساس .. وبتوصلها بالمعلومة اللي تخليها تبقى ليمون فتطلع طعمها حامض ونفس المية لما تروي بذرة قصب بتقرأ شفرتها وتطلعها بيطلع حلو .. رغم إن المية هي نفسها واحدة بنفس التركيب ونفس العنصر .. ده معناه إن المية بتتفاعل مع البيانات الروحية لكل كائن كأنها قاعدة بيانات كونية .. بتفهم الكود اللي جوه البذرة أو الجنين وبتفعله .. وده مش خيال على فكرة .. لأن العلم بدأ يكتشف إن المية فعلا عندها ذاكرة .. وفي تجارب كتير اتعملت ومنها تجارب العالم ماسارو إيموتو.. اللي شاف تحت الميكروسكوب إن بلورات المية بتتغير حسب الكلمة أو النية اللي بتتقال جنبها .. ولقوا إن المية بتحتفظ بالشكل الهندسي للمعلومة اللي دخلت فيها .. وده بيأكد إن المية فعلاً بتفهم النية وبتستجيب لوعي اللي حواليها . وده مش بس في النباتات .. دة حتى في كل الكائنات الحيه .. لان الميه اللي بتغذي جنين الإنسان هي نفسها اللي بتغذي جنين البقرة .. ولكن بمعلومات جينيه مختلفه .. لان الميه بتقرأ الشفرة الوراثية وبتتعامل معاها كأنها بتقول أيوه أنا فاهمة انت مين وعايز تبقى إيه بالضبط .. الميه هنا بتشتغل زي مترجم كوني .. بين الطاقة الإلهية اللي فوق وبين المادة اللي تحت .. هي اللي بتنقل الحياة من الغيب للظاهر ومن المجرد للمعلوم .. وده معناه إن الحياة مش جاية من الأرض ولا من الأكل ولا من التسميد .. الحياة جاية من المعلومة من الكود المشفر من الوعي المطلق .. والمية هي اللي بتستقبل الكود وتنقله .. وهي اللي بتخلي الصورة تتجلى في الواقع ببطء .. وده بيفسر ليه المية موجودة في كل مراحل الخلق .. هتلاقيها في رحم الأم و في البذور و في خلايا الدماغ و في العصب و في النخاع …….. الخ وهي الوسيط اللي بيخلي الحياة تمشي ولو خرجت منه بيتحول الجسد لتراب .. ربنا قال وما أنتم له بخازنين .. وده معنى عميق جدا لأن المية ماينفعش تتخزن لا في الجسم ولا في الأرض .. هي لازم تمشي ولو اتحبست تموت زي التنفس كده لو حاولت تمسكه يختفي .. بس لو سيبته يطلع ويدخل بحرية بيبقى حياة مستمرة .. يعني الميه لازم تتحرك علشان الحياة تستمر ودي طبيعتها وسرها ومعناها .. حتى من الناحية العلمية هتلاقي الميه مش مادة ثابتة .. لكن هي طاقة في حالة حركة دائمة .. والجزيئات بتاعتها بتتفك وبتتجمع ملايين المرات في الثانية .. وده بيخليها مثالية لنقل المعلومات .. زي السلك اللي بينقل الكهربا أو زي النت اللي بينقل بيانات .. يبقي كدة الميه هي شبكة الوعي الكوني اللي الحياة بتمشي من خلالها .. ومن ناحية الصوفية هتلاقي المعنى ده واضح جدا .. ابن عربي قال .. إن كل ما في الوجود حي بحياته لا بحياتنا .. يعني الله هو الحي وإحنا صور قائمين بحياته .. زي المية اللي بتعكس النور .. فطالما النور فيها هي بتفضل منورة .. ولما النور ينسحب هي بترجع ساكنة شفافة و صامته.. وده بالضبط اللي بيحصل لما الروح بتسيب الجسد لان المية بتخرج فبيجف الجسد .. لان الحياة انسحبت لكن المصدر لسه حي .. ولما نبص للموضوع من وجهة نظر فلسفية أعمق .. هنلاقي الميه بتمثل حالة الوعي في شكله الأنقى والارقي .. لأنها شفافة وسائلة يعني بتقبل تتشكل في أي شكل .. وده نفس صفات الوعي الإلهي .. اللي بياخد شكل كل حاجة من غير ما يتحبس في شكل واحد .. وحتى في الثقافات القديمة هنلاقي الهندوس قالوا إن الميه رحم الكون .. والصينيين قالوا إنها أعلى مظاهر الحكمة .. والمصريين قالوا إن أول تجلي للوجود خرج من محيط نون المائي .. والمسلمين قالوا وكان عرشه على الماء .. يعني نفس الفكرة متكررة من آلاف السنين والوعي عرفها قبل العلم ما يسجلها .. ولو بصينا بيولوجيا هنلاقي ان الميه جوه جسمك مش مجرد سائل دي وسط اتصال بين كل خلية والتانية .. يعني الميه هي شبكة التواصل الداخلية لجسمك اللي بتنقل الإشارات العصبية والذبذبات والمشاعر والنية .. فلما تشرب مية وأنت غاضبان هتلاقي جسمك كله بيتوتر .. ولما تشرب مية وأنت هادي ومتصالح هتلاقي المية بتشيل طاقتك وتنشرها في كل خلاياك .. علشان كده الرسول قال ارتوِ فقط وما قالش اشرب كتير .. لأن الارتواء هو توازن الطاقه والمعلومة جوه الجسم .. والزيادة بتكسر المعادلة .. الميه بتسمع وبتشوف وبتحس وبتستجيب بس بطريقتها .. اللي هي طريقة الوعي الصامت .. الميه مش حيه بذاتها ولا هي الحياة و لكنها حاملة للحياة .. الميه مش كيان مستقل ولكنها سلم بين الله والكون .. يعني لما تشوف نهر أو بحر أو نقطة ندى على ورقة .. افهم إنك قدام لغة من لغات الخالق .. بيتكلم بيها وبيظهر بيها وبيحرك بيها الوجود كله .. عشان هو الحي القيوم .. وهو الوعي اللي ما بينامش واللي ساكن في كل كينونة .. وبيظهر في الصورة اللي انت شايفها .. وبيفضل ساري حتى لما الصورة تختفي .. الميه هي مرايته في الأرض اللي بتعكسه في كل شكل وبتحتفظ بسره في كل نقطة .. خد لحظة دلوقتي واقفل عينيك وتخيل إن كل نقطة مية جواك بتقول الحي القيوم .. بصوت خفيف زي نهر بيمشي من قلبك لعقلك ومن عقلك لروحك ومن روحك للكون كله .. هتحس بالتيار وبالسريان وبالوجود اللي بيقوم بيك وبيقوم بكل حاجة حواليك .. ساعتها هتفهم إن الحياة مش حاجة بتمتلكها ولكن الحياة هي اللي بتعدي فيك .. حقائق_الوجود