زمن المغتربين في العودة إلى البلد زمان لم يجيك ضيف مغترب بتكون فيه ريحة مميزة كدة ريحة ماهي بعطر و لا شامبو و لا حاجة محددة بس هي ريحة انت بتشمها سمحة كدة و تشهيك الاغتراب مرت السنين و كبرنا و لسة الناس البتجي من برة ريحتهم سعودية سعودية و الحاجة دي ما بتنطبق بس علي ناس السعودية لا اي مغترب بيجي من برة السودان بتكون دي ريحته . اغتربنا نحن زاتنا لحدي ما كانت الفكرة الريحة دي انت ما بتشمها في نفسك بيشموها الناس التانيين الريحة دي حقيقة هي زيتك الطالع منك بس عشان طلع في مكيف كانت ريحته مختلفة ، الغربة حرفيا و ما كلام ونسة ولا اي شي ( بتطلع زيتك ) بتخليك مشحتف علي الناس و التفاصيل البسيطة بتتخلع لو جات مكالمة في نص الليل و قلبك بيتقطع لم تلقي في قروب الاسرة ونسة طويلة و اخر رسالة ظاهرة ليك ( الله يرحمه و يغفر ليه) بتجري بسرعة عشان تعرف منو الاتوفي . حقيقة شكرا لكل اب .. لكل اخ كبير.. لكل اخت...اي زول فارق اهلو و حبانو عشان يغير من وضع الاسرة عشان يخليهم عايشين في وضع احسن و اتحمل هو التعب. ربنا يصلح حال بلدنا ونرجع ليهو سالمين.