"ايوب" في الجزائر اللي العالم كله بيتابعه دلوقتي .. يوم الاربع اللي فات، ولد عنده ١٠ سنين اسمه "ايوب" من قرية الركن ببلدية الغاسول في ولاية البيض جنوب غرب الجزائر، اخوه طلع يرعى غنم وهو رايح يوصله ازازة مية، وقف فوق لوح خشب محطوط فوق فاتحة بير قديم عشان يبص على اخوه بس اللوح اتكسر تحتيه ووقع ايوب في البير، ابوه عرف والدنيا كلها عرفت، وايوب عايش، بس هنا المشكلة. البير قطره ٤٠ سنتيمتر وعمقه ٨٠ متر، طبيعة الارض جبلية، والبير نفسه مش مبطن ولا مغلف من جوة يعني مردوم تراب، فالحفر بيزود احتمالية ان البير يتردم فوقيه، والموضوع صعب جدا عالحماية المدنية وعالآلات، فهما بيحاولوا يعملوا خندق صغير يسمح بإخراج "ايوب"، وبقالهم ٣ ايام عالوضع ده، الدنيا كلها متابعة القصة، وحاليا وصلوا لعمق ١٥ متر، ودخلوا منها يحفروا بإيديهم، وشغالين مبيناموش . دعواتكم لأيوب يخرج لاهله بالسلامة ان شاء الله.