قالو في واحدة ورثت من ابوها مال النار ما تأكله وكانت بتحب ليها واحد مفلس .. واصرت انها تتزوجه .. واتزوجته فعلا بس هو ماخسر اي حاجة في العرس كويس؟ العرس كله كان على نفقتها .. وبعد العرس دلعته.. واشترت ليهو عربية ..وعملت ليهو شغل ..والقروش جرت في يده وبقى زول .. اول ما بقى عندو قريشات.. قال ليها انا عايز اتزوج تاني ..وحبيت لي واحدة ومابقدر اعيش من دونها .. انتي لو ماقبلانة ممكن اطلقك .. قالت ليهو جدا تتزوج طوالي ماعندي مشكلة .. بس اديني فرصة بتاعة شهر عشان اظبط حالي.. واتزين الناس مايشمتو فيني.. ويقولو اتزوج فيها عشان مبشتنة .. قال ليها موافق.. لكن بعد شهر بعرس طوالي .. قالت ليهو ماعندك مشكلة .. اتصلت على اخوها .. قالت ليهو يامصعب ..كلم اصحابك الشفاتة بتاعين الجيم .. عندي ليهم شغل ..خليهم يجوني اليوم الفلاني الساعة كدا .. اخوها جاب اصحابو الاتنين .. اتنين طواال وعراااض وعضلات مفتولة .. وضخمين مصارعين بس .. قالت ليهم.. اسمعوا انا عندي ليكم شغل لو نفذتوهو صاح.. كل واحد فيكم مليوون .. زمن المليون قروش قالو ليها بس مايكون قتل؟ .. قالت ليهم اعوذ بالله قتل شنو؟ شوف المراة دي عملت شنو .. اولا اتفقت معاهم على انهم يجوها يوم كدا بالليل الساعة 11 في الوقت ده هي سقت الراجل لبن فيهو حبوب منومة تنوم الفيل ..والجماعة الاتنين جو ها بعربية وشالو الراجل ختوهو في العربية وودوهو لبيت مهجور .. مقفل ليهو سنين وكانو مجهزين كفن وقبر محفور في الحوش .. كفنوهو وختو في القبر .. وغطوهو بطوب بحيث ما يحجبو عنه الهوا .. وقعدو يرشو فيهو بموية التلج .. لمن صحى ..ولقى نفسو مكفن في قبر ..قعد يكورك قالو ليهو .. اصمت ايها الملعون انت الان ميت ولن يسمعك احد .. قال ليهم انتو منو؟ قالو ليهو أنا منكر وهذا نكير .. وقعدوهو علي حيلو.. وكانو متنكرين بملابس سوداء وممسحين وشوشهم بسواد وبياض .. والحتة طبعا مضلمة قالو ليهو من ربك؟ .. قال ليهم الله ربي . مادينك قال الاسلام .. من نبيك قال محمد .. انا كدا ح ادخل الجنة؟ قالو السؤال الصعب ياتيك الان .. هل تزوجت هذه المراة بمالك؟ قال ليهم لا .. حينما جئتها . هل كان عندك مال ؟ قال ليهم لا .. المال الذي عندك الان من اين مصدره ... قال لهم من حقها هي .. قالو ليهو هل تريد ان تتزوج الان امرأة غيرها بمالها ؟؟ قال ليهم نعم صحيح .. قالو ليهو اليس هذا ظلمأ .. وتسمع تاااااح كف وبونية وشلوت .. دقوهو ليك دق العيش .. وقالو ليهو الدق ده ح يستمر معاك لغاية يوم القيامة .. هاك اشرب الموية دي عشان نواصل .. وادوهو موية فيها حبوب تااااااني ونام .. وشالوهو ودوهو البيت .. في سريرو بي هدومو العادية الكان نايم بيها .. وفاتو على كدا باكر الصباح صحى لقى نفسو في البيت .. قال للمراة .. انا حي ؟ قالت ليهو قول بسم الله ده كلام شنو؟ .. انت نايم تشخر وتنضم في نومك .. قال ليها يعني انا ما مت؟ قالت ليهو لا لا انت شكلك جنيت .. بس وشك مورم مالو؟ انت امس اتشاكلت مع زول وماكلمتني . سكت و عرف انها دي حلمة لكن المشكلة ورشو مروم من الضرب .. قالت ليهو .كدي هسي خليهو الكلام ده العرس متين؟ قال ليها عرس شنو؟ على الطلاق انا اموت معاك واحيا معاك.. انتي بعرسو فيك؟ فتبسمت .. وقالت ليهو بقلبها ود ام زقدة عشان تعرف الله حق ^_^ . من كتاب اتقوا كيدهن فالهلاك عندهن .. ✍️ يوميات `شايقي نجيض` 😂😂😂😂😂😂